حاسس إنى بتفرج على فيلم كارتون توم وجيرى
توم دايما وحش وشرير بينما جيرى هو البطل المنكسر فى الأول والمنتصر فى النهاية
أى واحد أيا كان مستواه الثقافى أو وضعه العلمى ممكن دلوقتى يفرش الملاية ويردح ويشتم وينظر فى إجراءات المجلس العسكرى أو مجلس الوزراء أو حتى المتهمين
بدءا من التويتر والفيسبوك حتى قنوات التوك شو
الكلام والرغى والعك لا له أو ولا آخر
لكن
مين ممكن يحاسب المتظاهرين والمعتصمين على أفعالهم
وليه كل حاجة بيعملوها لازم تكون مبرره أو صح أصلا؟ وليه لما حاجة غلط بتحصل من فئة ما بنلاقيش من يتحمل مسؤولية الخطأ ده وكأننا عيال صغيرين و بابا لازم يتحمل أخطاء العيال
يعنى التظاهر والاعتصام حق مكفول لكل مواطن
لكن بالنسبة لتغيب الناس عن العمل بسبب الاعتصام
والإضرار بالمصالح العامة
مين اللى هيعتذر عن إغلاق مجمع التحرير؟
مين اللى هيتحمل تكاليف إعادة تنظيف شوارع القاهرة من مخلفات الباعة الجائلين وتعليقات وشتائم الثائرين على الحيطان
مين الى هيتحاسب عن إغلاق الشوارع والطرق العامة
مين اللى هيعاقب بسبب تسريب إشاعات عن قطع الكهرباء عن مصر أو قطع ممر قناة السويس عن السفن
مين اللى هعيتذر عن توقف أكاديمية البحث العلمى عن نشاطها
وعن تكسير زجاج المدخل وانتشار التعليقات على حوائط المحاكم
أى حد ممكن يقول على نفسه إنه صاحب قضية وعايز حقه دلوقتى : بالصوت العال بالشتيمة بالاعتصام المهم يكون فى الصورة والفضائيات تصور علشان تملا مساحات من الحوار والرغى والبوابات الإلكترونية تجرى وراء الخبر وتصريحات كل من هب ودب.
النكتة إن جميع قوى الضغط تتحدث عن الحقوق والمطالبات دون أن تمارس فنون التفاوض والسياسة بينما كافة التيارات السياسية والأحزاب الجديدة والقديمة والنقابات تتحدث عن السياسة دون تمارسها يعنى الى الآن لم أسمع عن توسط أى حزب أو تيار سياسى لإيجاد حلول توافقية لأى فئات متضررة
حد فاهم إيه اللى بيحصل بالضبط ؟
No comments:
Post a Comment